Orðsending til hollvina frá Þóri Páli.

Ágætu hollvinir.

Með þessu bréfkorni vil ég minna ykkur á að 90 ár eru liðin frá því að Samvinnuskólinn hóf starfsemi sína  og 50 ár síðan Nemendasamband Samvinnuskólans var stofnað.   Þessara tímamóta er minnst með ýmsum hætti hér á Bifröst á árinu eins og ykkur er væntanlega flestum kunnugt um.

Það er einkum tvennt sem mig langar að minna ykkur  á núna og biðja ykkur að setja sérstaklega inn á stundaskrá hjá ykkur.

Föstudaginn 18. júlí verður haldin menningarhátíð á Bifröst í tilefni af 90 ára afmæli skólans, sem Edda Björgvinsdóttir leikari og nemandi í menningarstjórnun við Háskólann á Bifröst hefur tekið að sér að skipuleggja.  Þann dag verður hér skemmtidagskrá fyrir alla fjölskylduna frá kl. 11:00 til 16:00 og verður dagskráin auglýst nánar í fjölmiðlum næstunni.

 Laugardaginn 13. September verður síðan haldinn hollvinadagur hér á Bifröst í tilefni af 50 ára afmæli Hollvinasamtaka Bifrastar en forveri þeirra, Nemendasamband Samvinnuskólans, var stofnað þann 14. september 1958.   Dagskráin þann dag verður í grófum dráttum þannig að golfmót hollvina verður haldið á Golfvellinum Glanna frá kl. 10: 00 til 14:00.  Kl. 15:00 til 16:00 verður frumsýning á heimildarmynd um líf og starf í Bifröst sem ber vinnuheitið „ Í hrauninu heima“ og  Gísli Einarsson fréttamaður í Borgarnesi hefur tekið að sér að gera.   Eftir frumsýningu myndarinnar verður frjáls tími þar sem gamlir skólafélagar geta spjallað saman og rifjað upp gamlar endurminningar, farið í gönguferðir um nágrennið og jafnvel skroppið í sund ef áhugi er á því.  Þá verður líka hægt að kaupa sér hressingu á kaffihúsinu á Bifröst.   Um kvöldið mun síðan hljómsveitin Upplyfting leika fyrir dansi í hátíðasalnum af sinni alkunnu snilld.

Ekki verður hægt að fá gistingu á Bifröst á þessum tíma þar sem skólastarfið verður komið í fullan gang og því allt húsnæði upptekið.  Hins vegar má benda á gistimöguleika í sumarhúsum í nágrenninu og einnig á gististöðum í héraðinu eins og á Hraunsnefi, í Munaðarnesi, Hótel Hamri, Hótel Borgarnesi og Hótel Reykholti svo eitthvað sé nefnt.  Vissara er að gera ráðstafanir í þessu efni í tæka tíð ef t.d. einhverjir árgangar ætla að taka sig saman og mæta.

Hollvinasamtökin munu tryggja sætaferð frá Umferðamiðstöðinni í Reykjavík kl. 13:00 þennan dag og til baka um kvöldið eftir að dansleik lýkur ef einhverjir þurfa á því að halda og verður nánar tilkynnt um það síðar.

Vonumst til að sjá sem flest ykkar á Bifröst þann 13. september nk.

Munið að taka daginn frá strax.

Með bestu kveðju,

Fh. Hollvinasamtaka Bifrastar.

Þórir Páll Guðjónsson.

Það var eitt kvöld úti á Spánu... voða, voða gaman

Þetta er greinilega steindauður vefur hjá okkur (ykkur). Fenguð þið kannski alveg nóg hvert af öðru á útskriftarafmælinu í fyrra?

Datt bara svona í hug, ef ske kynni að eitthvert ykkar myndi ramba hér inn, að segja af mér örlitlar fréttir. Í gær flaug ég til Spánar - keypti mér miða aðra leiðina og er sestur að á Costa del Sol, nánar tiltekið í úthverfi Marbella sem heitir Nueva Andalucía. Fannst rétt að drífa í því (ekki þó Drífa Skúla) að rífa mig upp og fara á nýjar slóðir áður en ég yrði of gamall, sem aftur minnir mig á það að á morgun verð ég hálffimmtugur (blóm og kransar afþökkuð).

Og þetta er að sjálfsögðu frábær tímasetning því eitt af mínum fyrstu verkum var að fara á pöbb til að horfa á Spánverja taka Rússa í nefið. Hlakka til að sjá þá vinna Þjóðverja og geta fagnað Evrópumeistaratitli með nýjum nágrönnum.

Með sólarkveðjum úr 29 gráðu hita.

Halli del Sol
haralduring.blogspot.com